കസ്തൂരിയുമായി കാറിൽ യാത്ര, പിന്തുടർന്ന് പിടിച്ച് വനം വിജിലൻസ്; കോഴിക്കോട് മൂന്ന്പേര്‍ അറസ്റ്റിൽ
കോഴിക്കോട്: കസ്തൂരിമാനിൽനിന്ന് ശേഖരിച്ച കസ്തൂരിയുമായി മൂന്ന്പേര്‍ പിടിയില്‍. പന്തീരാങ്കാവ് കണ്ടഞ്ചേരി എം.എം.അബ്ദുൽ സലാം, തലശ്ശേരി പെരിങ്ങത്തൂർ പുതിയ വീട്ടിൽ ഹാരിസ്, കുരുവട്ടൂർ സ്വദേശി മുസ്തഫ എന്നിവരെയാണ് വനം വിജിലൻസ് വിഭാഗം അറസ്റ്റ് ചെയ്തത്.
കസ്തൂരിയുമായി കാറില്‍ സഞ്ചരിച്ച പ്രതികളെ പിന്തുടർന്ന് കോട്ടൂളിയിൽ വെച്ച് പിടികൂടുകയായിരുന്നു. ഈ കേസില്‍ പ്രതികള്‍ക്ക് എട്ടുകൊല്ലം വരെ തടവ് ലഭിച്ചേക്കാം. 
കോഴിക്കോട് ഫ്ലയിങ് സ്ക്വാഡ് റേഞ്ച് ഓഫിസർ പി.പ്രഭാകരന്റെ നേതൃത്വത്തിൽ ഡെപ്യൂട്ടി റേഞ്ച് ഓഫിസർ എ.എബിൻ, സെക്ഷൻ ഫോറസ്റ്റ് ഓഫിസർമാരായ ജഗദീഷ്കുമാർ, എം.വബീഷ്, ബീറ്റ് ഫോറസ്റ്റ് ഓഫിസർമാരായ എ.ആസിഫ്, സി.മുഹമ്മദ് അസ്‍ലം, ശ്രീലേഷ്കുമാർ, കെ.വി.ശ്രീനാഥ്, ഡ്രൈവർ പ്രസാദ് എന്നിവർ ഉൾപ്പെട്ട സംഘമാണ് പ്രതികളെ കുടുക്കിയത്.
രഹസ്യ വിവരത്തിന്റെ അടിസ്ഥാനത്തിൽ ഫ്ലൈയിങ് സ്ക്വാഡ് റേഞ്ച് ഓഫിസറും ഫോറസ്റ്റ് ഇന്റലിജൻസ് വിഭാഗവും താമരശ്ശേരി റേഞ്ച് സ്റ്റാഫുമാണ് പരിശോധന നടത്തിയത്.