ചേമഞ്ചേരി കുഞ്ഞിരാമന്‍ നായര്‍ക്ക് ശ്രദ്ധാഞ്ജലിയര്‍പ്പിച്ച് പൂക്കാട് കലാലയം
ചേമഞ്ചേരി : കഥകളിയെ ലോകത്തോളമുയര്‍ത്തിയ ഗുരു ചേമഞ്ചേരി കുഞ്ഞിരാമന്‍ നായര്‍ക്ക് പൂക്കാട് കലാലയം പ്രവര്‍ത്തകരും അധ്യാപകരും വിദ്യാര്‍ഥികളും ഗുരുപ്രണാമം എന്നപേരില്‍ ശ്രദ്ധാഞ്ജലിയര്‍പ്പിച്ചു. കുഞ്ഞിരാമന്‍ നായര്‍ക്കൊപ്പം പൂക്കാട് കലാലയത്തിന്റെ സ്ഥാപനത്തില്‍ പങ്കാളിയായ ശിവദാസ് ചേമഞ്ചേരി ദീപം തെളിയിച്ചു. പ്രസിഡന്റ് യു.കെ. രാഘവന്‍ അധ്യക്ഷത വഹിച്ചു.
കെ. ശങ്കരന്‍, കെ. ശ്രീനിവാസന്‍, ഡോ.മധുസൂദനന്‍ ഭരതാഞ്ജലി, ഡോ. പി.കെ. ഷാജി, കലാമണ്ഡലം ഗീത, എം.വി. എസ്. പൂക്കാട്, സുനില്‍ തിരുവങ്ങൂര്‍ എന്നിവര്‍ സംസാരിച്ചു. ഗുരുവിന്റെ ഛായാചിത്രത്തിനുമുന്നില്‍ കലാനിലയം ഹരി പാടിയ കഥകളിപ്പദങ്ങള്‍ക്ക് ചുവടുകള്‍വെച്ച് കലാമണ്ഡലം പ്രേംകുമാര്‍ ശ്രദ്ധാഞ്ജലിയര്‍പ്പിച്ചു.
